Publicidade Radio Fene
Praza do Concello s/n 15500 Fene (A Coruña) Galiza Tfno. 981 492 773 - Fax 981 492 772
Fai de Radiofusión a túa páxina de inicioRSS   BOLETÍN   CONTACTO
http://www.wikio.es
Envíar a Chuza

Radiofusión: A programación das Radios Municipais Galegas

Hoxe é Martes 14 de Agosto de 2018
Actualidade > Ficha da nova
Ficha da nova Enviar comentario

Divinas palabras 1933- 2018


Divinas Palabras Revolution. Cartaz.

O Centro Dramático Galego (CDG) celebrará o Día das Letras en Madrid, coa primeira das 11 representacións de Divinas Palabras Revolution que terán lugar no Teatro Español ata o 27 de maio. Trátase da primeira adaptación ao galego da coñecida obra de Ramón María del Valle-Inclán, que tamén aquí será escenificada no noso idioma, con sobretítulos en castelán. Ademais, esta versión contemporánea de Divinas palabras, que Xron dirixiu para o CDG, chega ao Teatro Español 85 anos despois da estrea da obra orixinal, que tivo lugar en 1933 nese mesmo espazo baixo a dirección de Cipriano Rivas Cherif, con escenografía deseñada por Castelao e con Margarita Xirgu como Mari-Gaila.

Sociedade16/05/2018Autor: Redacción

Nesta nova aproximación á obra de Valle, este papel está interpretado por Patricia de Lorenzo, como parte do elenco do que tamén forman parte Manuel Cortés (Pedro Gailo), Antón Coucheiro (Sétimo Miau), Borja Fernández (Migueliño), Mónica García (Marica do Reino), Tone Martínez (Candás), Victoria Pérez (Tatoola), Ánxela Ríos (Simoniña) e Tomé Viéitez (Laureano).

Na versión que asinan Manuel Cortés e Xron, con dramaturxia deste último, os devanditos personaxes son os concursantes dun programa de telerrealidade, durante o que teñen que convivir nunha casa-plató vixiados polas cámaras 24 horas. Deste xeito, a ‘traxicomedia de aldea’, como foi subtitulada a obra orixinal polo seu autor, convértese aquí en ‘traxicomedia de aldea global’.

Con motivo da estadía do CDG en Madrid, o Teatro Español organiza unha actividade pedagóxica a modo de charla con Xron, que terá lugar o 23 de maio, ás 17,00 h. Nela, o director explicará o proceso de adaptación e montaxe desta versión “insconscientemente libre” de Divinas Palabras. A acción está dirixida a profesionais e estudantes de arte dramática e artes escénicas, así como a todas aquelas persoas interesadas na obra de Valle-Inclán, na actividade do Centro Dramático Galego ou no traballo do Grupo Chévere, ao que está vencellada parte do equipo artístico desta produción.

Tras a súa exhibición en Madrid, Divinas Palabras Revolution regresará a Galicia para continuar a súa xira o 1 de xuño no Barco de Valdeorras, 8 e 9 de xuño na Coruña, 14 de xuño en Pontevedra, 16 de xuño en Rianxo, 21 e 22 de xuño en Vigo e 29 de xuño en Cangas.Para finalizar, o espectáculo regresará á sede do CDG no Salón Teatro de Santiago, onde ofrecerá catro últimos pases do 5 ao 8 de xullo, para lle dar resposta á boa acollida de público que tivo en Compostela durante o pasado mes de abril. 


Comentarios:
Praza do Concello s/n, 15500 Fene (A Coruña) Galiza - Tfno. 981 492 773 - Fax 981 492 772 Nota Legal
Actualidade Novas Axenda Podcast
Participa Fai Novas Enquisas Foros