A estas alturas, coido que todo o mundo sabe que a anorexia e a bulimia son trastornos severos da alimentación que supoñen graves desequilibrios e que nada teñen que ver cun capricho adolescente por deixar de comer. Téñense feito boas reportaxes ao respecto que o deixan claro. Pois a Samanta Villar, a reporteira que é unha reportaxe andante en si mesma, non lle abonda con informar ben e polo miúdo destas doenzas. Cavilou en que se lle faría máis caso se fixese un ‘Morgan Spurlock’ invertido: Spurlock logrou o éxito enchéndose de hamburguesas Mc’Donalds no documental “Super Size Me”.  

Samanta Villar grávase mentres deixa de comer 21 días e xógase a saúde para demostrar que a anorexia é mala porque semella que non vé mellor xeito de contalo. As relacionadas coa comida son doenzas perigosas, pero tamén o é a falta de sentidiño común dunha xornalista que confunde o intrépido co estúpido, e dos produtores dunha canle Cuatro, que emite “21 días” esta noite ás once e cuarto.