O track, composto por Vaquero, contou coa colaboración de Xavi Font e a voz de Hugo Silva. O propio músico de Friol foi, xunto con Font, o encargado de crear toda a música deste filme protagonizado por Carmelo Gómez e o mesmo Silva. Pero non foi esta a  única contribución da provincia na música desta película, senón que a formación Dummie Project, na que participa tamén o DJ vilalbés Marcos Peón e a cantante coruñesa Lis,  incluíu o seu single “Baila mi ritmo” na banda sonora da película.

Novos proxectos de Dummie Project

Tras o lanzamento deste primeiro tema, a banda luguesa centrouse en remesturar o single “Phonic Lounge”, un dos principais enchepistas da música electrónica portuguesa. Outra das súas últimas creacións foi un remix de “Love beat” de 2Seal & DJ Frisco. Esta última creación é un encargo dun dos selos mais importantes de Estados Unidos, “Neurotic Groove”, o que lles permitirá colocarse nunha boa posición para asaltar as listas mais importantes do continente americano.

Outro dos temas creados por Dummie Project foi “It´s Troco”, que se pincha habitualmente na macrodiscoteca Troco de Vilalba e conta coas voces propias da xente asidua a escoitar e participar nas sesións nocturnas de música House de Marcos Peón.

Na actualidade Vaquero e Peón traballan para sacar o seu terceiro single e na produción, xunto coa axencia “Yellow House”, dunha das festas que será referencia do verán nacional e que, baixo o nome de “A taste of Ibiza”, porán a súa música os mellores Dj´s de España.