Sete serán os cicerones desta visita, cadaquén co seu xentilicio e tópico ao lombo que engadir ao de galego. Coñeceremos a Reinier, que cumprindo coa fama algo hippie dos holandeses ensinaranos o espazo natural da Illa de Ons. O evanxelizado Desiree, da Costa de Marfil, administrará diante de nós a sagrada forma nunha das misas que imparte como cura rural. O romántico italiano Massimo, violinista na Sinfónica de Galicia, paseará baixo a sombra da Torre de Hércules. De Orlando din que é “cubano danzón”, pero non é un tópico con pernas, senón que realmente oficia de profesor de salsa en Riveira. A croata Ana, que fuxiu da guerra dos Balcáns, habita agora entre o balbordo de Vigo e admira o seu xigantesco porto pesqueiro. A mestra Ela, demostrará que os polacos son tan emigrantes ou máis que os galegos en Santiago de Compostela. E, a conversión última, o peruano José, fisterrán de adopción, demostrará que aínda os hai con arroutos de participar da moi particular política da fin do mundo e chegar a alcalde. “Destino España” emítese en La Primera pasadas as once e media da noite.