Os anos pasaron e MAM xa é Miguel Ángel Muñoz, disque un actor con  certa sona mesmo no respectado circuíto teatral. Pero esta noite pasa por “El Hormiguero” a falar da súa última estrea cinematográfica, coa compaña dunha das súas compañeiras no filme, a nova presentadora de “¡Mira quién baila!”, Pilar Rubio, tamén coñecida como “ti antes molabas” e agora obrigada a vestir roupa con adobíos de strass e rirlle os chistes a Belén Esteban en Telecinco. O filme que comparten titúlase “Tensión sexual no resuelta”, que, a fin de contas, é o motor que vén animando todas as comedias románticas que no mundo foron, e, de seguro, a todos os compañeiros das redaccións polas que pasou Pilar Rubio, durante anos votada como a muller máis sexy de toda a televisión. Máis tensión, non necesariamente sexual, será a que reciban nos experimentos que lles agardan durante o seu paso polo programa de Pablo Motos, que comeza ás nove e media en Cuatro.