A formación compostelá Obras Públicas propón con este espectáculo un novo xénero de teatro, o paripé, onde a parodia e o humor deben ser rescatados dos bares e levados de volta aos teatros. César Goldi, Mos e Iolanda Muíños compoñen o trío interpretativo desta montaxe na que mesturan en proporcións similares música, teatro e cachondeo, acadando así un 100% de paripé.

Life is a paripé está estruturada en once “sketches” que convidan a reflexionar sobre o que somos e o que aparentamos ser: Desfile de moda sexual, Reencontro de amantes, A castración de Manolo, O verdadeiro “Jamlet”, Campións de zapping, Balada punkie para Cecilia, Drama do Actors Studio, A poetisa Sinforosa Prados, Zarzuela de gilipollas, Netos de Peter, Paul and Mary e Os nenos do Muro de Pink Floyd.

As entradas para as dúas representacións de Life is a paripé poranse á venda no despacho de billetes do Salón Teatro desde dúas horas antes do comezo da actuación. Ademais, poden adquirirse por adiantado na billeteira electrónica da web caixagalicia.es ou a través do teléfono 902 43 44 43. O prezo das localidades é de 10 euros.