Este sendeiro ven de ser posto en valor coa realización dunha serie de obras orientadas a mellorar a súa accesibilidade e transitabilidade. Obras consistentes na mellora do firme e desbroce de laterais, revexetación do contorno mediante un plan de recuperación da vexetación autóctona, creación de pequenas áreas de descanso e miradoiros e a recuperación das fontes existentes. O proxecto promovido pola Mancomunidade de Montes Veciñas contou cun orzamento de 180.000 euros dos cales 145.000 foron polo programa Proder II. O presidente da Mancomunidade, Francisco Puch mostrábase satisfeito por un proxecto que se iniciou no ano 2005 e que “permite recuperar para uso e goce dos veciños unha zona cun gran valor ecolóxico e excepcionais vistas sobre a ría de Vigo”. A hora de levar a cabo este proxecto o principal obxectivo foi converter o antigo Camiño da Traída de Augas de Redondela nun corredor verde, mediante a recuperación ambiental do entorno e a dotación da zona con infraestruturas básicas para un mellor goce dos visitantes. A fase que se vai a desenvolver a continuación consistirá nunha campaña de promoción co obxectivo de dar a coñecer o Roteiro.