Galicia continúa entre as comunidades autónomas cun maior grao de privatización sanitaria, só superada por Madrid, Catalunya e Balears, segundo salienta o xornal dixital Praza. Son, estes catro territorios, os que levan ocupando os catro primeiros postos deste ránking elaborado pola Federación de Asociacións para a Defensa da Sanidade Pública (FADSP) a partir dos seus informes sobre A privatización sanitaria das CCAA. No terceiro destes balances, destácase que "a privatización aumentou en todas as autonomías" e que "o resultado e os movementos na clasificación só recollen a maior ou menor intensidade que acadou en cada comunidade en concreto".

    Galicia baixa un posto no ránking pero segue a estar incluída no grupo dos sistemas sanitarios cun "elevado grao de privatización"

Galicia, que ocupou o podio da privatización nos últimos dous informes, baixa agora ata a cuarta posición, pero segue a estar incluída no grupo de "elevado grao de privatización", tal e como destaca FADSP, que repara no feito de que as catro autonomías ocupasen ese negativo liderado en canto á súa sanidade nos últimos anos. Pola contra, Extremadura e Castilla-La Mancha ocupan os dous últimos postos nos tres documentos elaborados pola Federación.