“Sempre foi moi próxima á xente que traballaba na entidade”, contou en Radiofusiòn o vogal da Asociación de Xubilados do Banco Pastor: “Facíanos unha visita no Nadal e en fin de ano para saudar aos empregados que estabamos no edificio dos servizos centrais na Coruña, e sempre resultaba agarimosa, pero noutros eidos imaxino que amosaría máis tenacidade porque lle correspondería amosar un carácter forte”.

Empregado como mozo dos recados no ano 1963, o veterano da entidade viviu o forzoso cambio no temón provocado pola morte do Conde de Fenosa. “Naquel entón en España non había mulleres en practicamente ningunha esfera importante de decisión e mesmo no banco había moi poucos anos que empezaran a entrar a traballar xente nova e mulleres”, aclara José Antonio Rivera, quen salienta a “capacidade de adaptación” de Carmela Arias para “transformarse e facerse cargo dende unha actividade allea ás empresas”. Ela fortaleceu os alicerces do Banco e da Fundación, segundo o antigo empregado, que resistiu os rumoreados intentos de absorción “que se repetían con cada ciclo de cinco anos”.

As exequias de Carmela Arias terán lugar na intimidade durante a xornada de mañá mércores. Os que queiran despedirse da condesa de Fenosa poderán asistir ao funeral público que se desenvolverá na igrexa herculina de San Xurxo, mañá xoves ás oito do serán.