“Moi orgullosos, os meus avós sobre todo”. Así acolleu a súa familia o logro de Pablo. Desde o mes de agosto e ata xullo do ano que vén está traballando no Grupo de Refrixeración e Ventilación do departamento de Enxeñería desta organización de investigación europea que ten a súa sede preto de Xenebra. “Moi ben, contento”, séntese Pablo. “Desde fóra parece frío, pero está cheo de experimentos e de persoas interesantes”, describe o CERN, ao que chegou logo de superar un proceso longo de selección. Traballa no grupo que está encargado de controlar a temperatura e a humidade para garantir o correcto funcionamento dos equipos. “Disfrutando do momento”, para o que se preparou no Campus Industrial de Ferrol. Centrado no traballo, vive nun pobo francés pequeniño, onde xa caeron as primeiras neves, nun ambiente moi distinto ao de Fene, onde agarda volver para o Nadal.