O conselleiro do Medio Rural, Samuel Juárez, deu a coñecer hoxe os pormenores da resolución destas axudas durante a súa visita ao Parque Natural da Baixa Limia-Serra do Xurés, en compañía do director xeral de Conservación da Natureza, Ricardo García-Borregón, entre outras autoridades. O do Xurés (na provincia de Ourense e fronteirizo con Portugal) é un dos 6 parques naturais declarados actualmente en Galicia, xunto cos do Complexo Dunar de Corrubedo e Lagoas de Carregal e Vixán e Fragas do Eume (ambos na provincia da Coruña); O Invernadeiro e Serra da Enciña da Lastra (na de Ourense) e Monte Aloia (na de Pontevedra).
Beneficiarios
Os beneficiarios destas axudas, –financiadas con fondos propios da Xunta e tamén do Programa de Desenvolvemento Rural (PDR) de Galicia 2007-2013 (cun cofinanciamento do fondo comunitario Feader)– son propietarios de terreos situados nun deses seis parques naturais ou na súa área de influencia; titulares de explotacións agrarias ou gandeiras que estean dentro dun destes espazos protexidos; comunidades de montes veciñais dun dos parques; empresas dalgún dos municipios en que se sitúa o espazo protexido ou concellos que teñan toda ou parte da súa superficie dentro dun parque.
O importe total destas axudas xestionadas desde Medio Rural ascende a 2.019.899 euros, dos cales máis da metade (1,1 millóns de euros, aproximadamente) corresponden a solicitudes presentadas por beneficiarios do Parque do Xurés e a súa zona de influencia (neste caso hai que ter en conta que este espazo protexido é o de maior extensión de Galicia).
A continuación, por contía das axudas recibidas, estarían o parque das Fragas do Eume (460.000 euros, en números redondos), Enciña da Lastra (cuns 174.000 euros), Corrubedo (162.000 euros) e Monte Aloia (preto de 60.000 euros).
Do total das axudas concedidas (108) a maior parte dos beneficiarios (57 en total) corresponden ao Parque do Xurés. Por número de axudas recibidas, a continuación estarían das Fragas do Eume (24); os de Corrubedo (15); os da Serra da Lastra (8) e os de Monte Aloia e O Invernadoiro (con 2 axudas cada un).
Por concellos, no Xurés reciben axudas os de Bande, Calvos de Randín, Entrimo, Lobeira, Lobios e Muíños. Nas Fragas do Eume, os da Capela, As Pontes, Cabanas, Monfero e Pontedeume. Por último, naqueles parques que só abarcan territorios dun único municipio, as axudas a concellos son para os de Rubiá (na Enciña da Lastra), Tui (no Monte Aloia), Vilariño de Conso (no Invernadeiro) e Ribeira, no caso do parque de Corrubedo.
Iniciativas destacadas
Entre as iniciativas que reciben axuda con cargo a esta convocatoria cabe salientar, por exemplo, a rehabilitación da muralla do mosteiro de Monfero (proxecto presentado por este Concello coruñés, no parque das Fragas do Eume); as melloras nas zonas de esparexemento no entorno das capelas de Santa María de Riocaldo e San Bieito de Grou, iniciativa do Concello ourensán de Lobios (parque do Xurés) ou a creación e mellora de infraestruturas de uso público e acollida ao visitante, neste mesmo espazo natural, iniciativa presentada pola empresa Quinta da Viña Grande.
No seguinte cadro resúmense os principais datos destas axudas (importes e beneficiarios por parques naturais):
PARQUE BENEFICIARIOS IMPORTE TOTAL
XURÉS 57 1.128.383,37
EUME 24 460.261,9
CORRUBEDO 15 162.851,25
E. LASTRA 8 174.301,08
MONTE ALOIA 2 59.419,42
O INVERNADEIRO 2 34.682,25
TOTAL 108 2.019.899
Accións
Estas axudas, que xestiona a Dirección Xeral de Conservación da Natureza, foron convocadas en xuño de 2010 e teñen como principal obxectivo fomentar accións como a mellora da paisaxe agraria; a limpeza e restauración de camiños; a sinalización; a creación e mellora de infraestruturas de uso público e de acollida ao visitantes; a preservación de hábitats e vexetación de ribeira; a conservación das poboacións de especies protexidas; a loita contra a erosión ou as accións e actividades de educación ambiental.
