O CD Burela FS, club organizador da XVII Copa de España de Fútbol Sala Feminino, xa coñece as datas para a celebración do evento. Será entre o venres 3 e o domingo 5 de xuño, coincidindo cos concorridos festexos patronais da vila, unha cita de referencia na comarca da Mariña e na provincia luguesa.

O pavillón Vista Alegre acollerá os cuartos de final na primeira xornada, cos cruzamentos de primeiro clasificado-oitavo, segundo-sétimo, terceiro-sexto e cuarto-quinto. O sábado, nas semifinais, veranse as caras o gañador do primeiro-oitavo co do terceiro-sexto e o vencedor do segundo-sétimo co do cuarto-quinto. O campión decidirase o domingo na gran final.

Esta será a primeira vez que a bomboneira albergue un campionato nacional tras ser a sede de eventos como a XVII Copa Galicia en 2006 ou os amigables da Selección Española ante Romanía e Uruguai, en 2007 e 2008.

O presidente do clube o burelés José Ramón González Casas manifestou hoxe nos micrófonos de Radio Burela a súa satisfacción por seren os encargados de acoller a Copa da Raíña. Salientou que este acontecemento deportivo será unha gran ocasión tamén para dar a coñecer Burela e dinamizar o turismo e a economía da zona. Durante a celebración do torneo desplazaranse ata a localidade mariñana oito equipos cos seus correspondentes corpos técnicos e demais acompañantes. As aficións que acudirán ver os partidos tamén terán un papel moi importante. A 'marea naranxa' como se deu en chamar ós siareiros do Burela F.S darán seguro exemplo de apoio ó equipo como veñen facendo en tódolos encontros e desplazamentos do clube.