Máis de duascentas entradas integran este dicionario persoal de Xesús González Gómez, pero son moi poucas as referencias a Galicia. “Eugenio Granell foi o único surrealista galego”, asegura o estudoso, desbotando que o adxectivo serva para definir, como se adoita facer, a Maruja Mallo ou Urbano Lugrís. “Eles asimilaron algunhas técnicas do movemento, pero non a súa cosmovisión do mundo”, explicou en Radiofusiòn.

A obra recolle, en orde alfabética, ensaios sobre diferentes artistas, países e temáticas relacionados con esta corrente vangardista. Porén, o autor pensa que no futuro aínda se poderán escribir novos capítulos sobre a materia. González Gómez, ao contrario que moitos outros expertos, defende que o movemento continúa vivo. “Só pode desaparecer cando se realice a utopía surrealista”, argumentou en Radiofusiòn.