A CIG adoitaba conmemorar o 10 de marzo con manifestacións en Vigo e Ferrol, pero nesta ocasión, dada a gravidade da crise económica, amplíanse os actos reivindicativos a todas as comarcas. O secretario comarcal de Vigo, Xerardo Abraldes, asegurou nos micrófonos de Radiofusión que resulta “imprescindible” mobilizarse  e que manexan a posibilidade de convocar unha folga xeral se non se toman “medidas inmediatas”.

No Día da Clase Obreira Galega a CIG protesta pola elevada taxa de destrución de emprego e solicita a ampliación do dereito á cobertura das prestacións. Nesa liña, fan especial fincapé nunha vella reivindicación da organización: a creación do salario de inserción social.