Os veciños indican que no edificio, un pequeno bloque de pisos, non había ninguén vivindo. A forte explosión fíxose sentir en localidades próximas. Os artificieiros da Garda Civil tomaron mostras do explosivo, que deixou o local socialista completamente esnaquizado. O secretario xeral dos socialistas galegos, Pachi Vázquez, visitou o local de Teo para comprobar a gravidade dos danos. Vázquez dixo sentirse «indignado» pero asegurou que este tipo de actos «non van atemorizarnos». En compañía do delegado do Goberno en Galicia, Antón Louro, visitou o local ubicado en Cacheiras e afirmou que en canto estean reparados os danos causados no local socialista, a dirección do PSdeG-PSOE reunirase nel como mostra de apoio aos compañeiros do partido neste municipio coruñés. No pasado mes de setembro os locais do PSdeG en Salvaterra de Miño, A Estrada e Salceda de Caselas foron obxectivo deste tipo de explosións causando tamén importantes danos materiais. Outro artefacto estourou nese mesmo mes na oficina do INEM de Lugo.