Dende o seu ámbito de actuación defenden a necesidade de que Galicia conte cun ensino público en galego, tanto na lingua de expresión, que debe ser vehicular en todas as materias comúns agás, loxicamente, do ensino doutras linguas, como na fixación dos currículos.

A confederación de ANPAS GALEGAS defende que "A nosa infancia e mocidade teñen que aprender cal é a nosa realidade, a nosa cultura, a nosa identidade, e iso teñen que o aprender en galego porque é a lingua que inventamos para describirnos, é a lingua que nos define e que nos acubilla".

Por iso defenden que o noso idioma ten que ter un trato absolutamente preferente nos plans educativos galegos, que se debe potenciar o seu uso maioritario no ensino galego, para que os que veñen detrás o dominen, o coñezan, o utilicen e, por riba de todo, sintan por el o cariño, veneración e respecto que merece o maior dos nosos patrimonios: a Nosa Lingua.