Entre outros moitos aspectos do traballo de Marcote, Modesto Fraga refírese á súa relación con Manuel Murguía, co cal o fisterrán se sentiu decepcionado. “Marcote cumpriu un papel fundamental na posterior fundación da Real Academia da Coruña. Eles mandaban diñeiro para a Academia. De feito, hai varios artigos de Marcote nos que se lamenta e se sinte decepcionado pola postura de Murguía. Eles foron os que financiaron a Historia de Galicia de Murguía. Na Habana tamén se publicou Follas Novas de Rosalía. Os emigrantes como Ramón Marcote estaban doídos con Murguía porque non entendían como, de súpeto, a Academia era a máxima opositora da tese do Colón galego só porque houbo un intelectual pontevedrés, Celso García de la Riega, defensor deses postulados, con quen si Murguía tiña polémicas anteriores”, afirma o autor de 'Ramón Marcote. Obra en prosa. Volume 1' no clube de lectura de Radiofusión. Modesto Fraga agarda que as investigacións sobre o ADN poidan certificar de xeito científico que Cristobal Colón naceu en Poio.

Na imaxe, Henrique Sanfíz, Pepe Formoso, Modesto Fraga e Antonio Tizón no hotel Bela Fisterra.