Denuncian colapso nas urxencias dos hospitais

Denuncian colapso nas urxencias dos hospitais

07 de Febreiro, 2014 - 12:00 h. | Publicada por Radio Negreira

Os sindicatos e os médicos de urxencias denuncian colapsos nos centros hospitalarios galegos. Reclaman a dotación de persoal para cubrir as baixas e máis o material necesario para a atención á poboación. En Santiago denuncian o amoreamento de pacientes nos pasillos.

O número de falecidos en Galicia en relación co virus da gripe aumentou a sete persoas, coa morte de dous pacientes ingresados en hospitais de Ferrol e A Coruña.

Segundo os datos facilitados este xoves pola Consellería de Sanidade, ás cinco persoas falecidas en hospitais de Ourense, Vigo, Lugo, Ferrol e Pontevedra, as cales presentaban factores de risco, sumáronse outro paciente en Ferrol e outro no Complexo Hospitalario Universitario A Coruña (Chuac).

A cifra de pacientes ingresados en hospitais de Galicia debido ao virus da gripe volveu a descender a 144 este xoves, o que supón cinco menos que os rexistrados o mércores. Deles 34 están na Unidade de Coidados Intensivos (UCI) dos centros correspondentes.

Fontes da Consellería de Sanidade sinalaron que a "onda parece que está no pico, estable, con lixeira tendencia ao descenso". No entanto, as mesmas fontes sanitarias non descartan un repunte.

Sociedade