O confinamento non pode coa simpatía da artista fenesa Laura Bouza. O seu laboratorio artístico “Laudas calamiti” permanece en situación de cese de actividade desde o 13 de marzo, cando se decretou a alarma sanitaria. En todo este tempo non parou de facer cousas, desde mellorar as instalación do obradoiro coa execución dun mural na fachada, ata estar  programando os campamentos de verán e un aula virtual, e mesmo preparar a súa próxima exposición particular que titulará “Hurgamientos desde el pensamiento”.

“Como artista paso o confinamento moi ben porque tes tempo para traballar na túa obra, pero é triste ver o obradoiro baleiro, sen pequeartistas” Así se sente Laura Bouza en relación a un confinamento obrigado que xa vai para dous meses. Ata que remate o estado de alarma o seu laboratorio seguirá en situación de “cese de actividade”. É por iso que xa dá por rematadas as clases por este curso.  Pero está metida de cheo na programación dos campamentos artísticos que Laudas Calámiti oferta no verán e que dará pronto a coñecer. Tamén traballa Bouza, coa axuda dunha experta, na posta en marcha dunha aula virtual para complementar as clases presenciais nunha plataforma que inclúe a súa páxina de artistas, a tenda online e a páxina do laboratorio onde pensa por en marcha esa aula á que accedería o seu alumnado a través dunha clave.

Estes meses de encerro serviron tamén a Laura Bouza para traballar na exposición que ten previsto en abril de 2021. Unha obra que a levou a investigar con novos materiais, neste caso con láminas de celulosa, e que “vai falar de cousas interiores miñas” aclara a artista e profesora fenesa, quen compartiu con nós este inquietante título “Hurgamientos desde el pensamiento”.

(Na imaxe, parte do mural inacabado de Laura Bouza, na fachada do seu laboratorio artístico en Fene).