O titular de San Caetano evitou referirse ás causas que motivaron a renuncia do famoso autor de literatura infantil e xuvenil a uns galardóns que a Xunta remudou respecto ao seu deseño orixinal. Os premios naceran en tempos do bipartito co nome de Premios Nacionais da Cultura e contaban cunha dotación económica que agora se lle detraeu. Isto, segundo a Plataforma Prolingua, coa que se significa Fernández Paz, supón “devaluar” a cultura galega. O escritor, contrario ao impacto do decreto do plurilingüismo na normalización do idioma galego, xa manifestara con anterioridade a súa oposición aos novos premios pola deriva que, respecto da cultura na lingua propia, estaba a adoptar a Xunta. Nesta xornada, Núñez Feijóo afirmou que as distincións “recoñecen aos mellores creadores galegos independentemente da súa ideoloxía”.