As reflexións de Núñez Feijóo arredor da intervención de quen fora presidente do seu partido resultan totalmente diverxentes as pronunciadas noutras circunstancias semellantes. Cando Rosa Díez e Montilla empregaron o termo “gallego” para criticar a rivais políticos, Feijóo falou de falta de respecto e esixiu rectificacións. 

A oposición política en Galicia reaccionou de xeito vehemente ás declaracións do ex presidente español. O voceiro nacional do BNG, Guillerme Vázquez, interpretou as súas palabras como “racismo anti-galego” e criticou que Feijóo “asista impasible aos ataques ao noso País sen mover un músculo da súa faciana”. “Reaccionario e intolerante” foron outros cualificativos que o nacionalista empregou para definir a Aznar, afirmando que o único galego ao que este lle “profesa admiración” é Franco. 

Tamén o secretario xeral do PsdeG, Pachi Vázquez, reclamou de dous galegos como Mariano Rajoy e Alberto Núñez Feijóo que “pidan desculpas e desautoricen as palabras de Aznar”. “Non queda espazo para medias frases e medias verdades”, afirmou o líder socialista, asegurando que nunca escoitara “maior insulto, porque seguramente a única virtude que ten Rajoy é precisamente ser galego”.Dende o PsdeG tamén se manifestou o deputado José Manuel Lage Tuñas, declarando que “abonda xa de aturar a desconsideración de outros ao tentar minusvalorar a nosa condición, porque non temos nada que desmerecer”. Para o socialista, Aznar demostrou ser “un cretino”.