Xa na tarde de onte o PSOE de Fene fixo público un comunicado no que aseguraba o seu compromiso para facilitar un goberno de esquerdas na localidade. Tras xuntanzas mantidas co BNG, “evidenciouse a necesidade de abrir unha nova etapa de entendemento para garantir o obxectivo de mellorar a vida da cidadanía deste Concello”. Os tres edil es socialistas votaron polo seu candidato Joaquín Ayala. O PSOE comprometerase co BNG a que, na hipótese de recibir os votos dos ediles do PP, os socialistas absteríanse co que se garantía a elección do candidato nacionalista.
Joaquín Ayala ((PSOE) e Tamara Miragaya (PP) formaron a mesa de idade que dirixiu a sesión plenaria, tomaron aos concelleiros e concelleiras electos promesa ou xuramento de cumprir co seu cargo de acordo coas leis. A concelleira socialista María José Ares Sanmartín prometeu o seu cargo cun feixe de rosas vermellas na man. A edil popular Noemí Carballo tropezou co atril e caeu ao chan o exemplar da Constitución española sobre o que os representantes electos fixeron patente o seu compromiso coa lei. Os ediles do BNG especificaron que prometían por imperativo legal comprometéndose tamén a defender os intereses da veciñanza de Fene e do pobo galego”.  O socialista Ayala -como presidente da mesa de idade- entregoulle o bastón de mando ao alcalde o nacionalista Trigo,o que despertou os aplausos do numeroso público que ateigaba o salón de plenos da Casa do Concello. 
Mocións de censura
A Corporación de Fene debateu dúas mocións de censura nos dous últimos mandatos. A primeira foi asinada polos concelleiros do PP e de Somos Fene contra o alcalde do BNG Juventino Trigo. Nun primeiro pleno en outubro de 2017 non se votou a moción xa que a mesa de idade interpretou que non se cumprían as condicións esixidas pola lei para unha iniciativa desas características. Debateuse en febreiro de 2018 e saíu adiante substituíndo Gumersindo Galego (Partido Popular) ao mandatario nacionalista. A segunda presentárona os concelleiros do BNG, EU e tres do PSOE contra o alcalde do Partido Popular Gumersindo Galego. Debateuse en febreiro de 2020 e saíu adiante elixindo como primeiro rexedor a Trigo (BNG) e retirándolle o bastón de mando ao popular Galego. Despois deses dous axitados mandatos (2014- 2019 e 2019- 2023) este mediodía comezou unha nova lexislatura que se agarda cunha maior estabilidade.

Na imaxe Joaquín Ayala (PSOE) entregándolle o bastón de mando a Juventino Trigo (BNG)

Fotografía Xan Xe