“Buscar un nome case acaba co grupo”, afirma Roi, quen tamén comentou que un chiste sobre o contorsionista italiano acabou decidindo que a banda se chamase como o artista circense, L´Uomo Di Gomma.

Atopar un título para o EP parece que foi cousa máis doada. O baixista comentou como a obsesión do letrista, Josete, pola política estadounidense republicana Sarah Palin o levou a compoñer o seu primeiro tema político, unha anti-oda ao movemento Tea Party.

L´Uomo Di Gomma xa contan cun repertorio duns 15 temas propios que interpretan nos concertos e que agardan converter en disco en breve, como fixeron con este primeiro traballo. Tea Party EP foi gravado e mesturado en directo, nun só día en novembro, quedándose coas primeiras tomas e sen moita produción, para que as cancións soen o máis parecidas ao concerto.

L´Uomo Di Gomma amósanse tamén contrarios ás discográficas e a entidades como a SGAE, por iso, e para facilitarlle ao máximo o traballo aos que acudan aos seus concertos puxeron os seus temas a libre descarga na rede.