“Pensaba que Galicia era algo pacata, pero equivocábame”, afirmou Teo Manuel Abad en Radiofusiòn ao lembrar como naceu o proxecto. O primeiro en chamar a súa atención foi a celebración do primeiro Salón Erótico de Vilagarcía, así que decidiu coller a súa cámara, pórse a gravar e a recoller distintos testemuños, desde as palabras dos participantes ata as opinións do cura da vila. Ese foi o punto de partida dun percorrido por diferentes proxectos que os espectadores poderán ver por primeira vez no marco do festival Cineuropa de Santiago de Compostela.

Mentres dá os últimos retoques a montaxe de Entre o ceo e a terra, Teo Manuel Abad continúa a promoción do seu último documental, Flores tristes, no que recupera a memoria dos represaliados durante o Franquismo. O feito de que case coincidan no tempo dúas propostas tan diferentes significa, segundo o director, que “en Galicia existe un verdadeiro viveiro de ideas que cómpre aproveitar”.