Persoas a título individual foron as primeiras en pórse en contacto co estudio Más Arquitectura, que coordina o proxecto presentado, para ofrecer o seu apoio económico. Tamén houbo contactos positivos con algunhas empresas, mentres que as negociacións coas administracións aínda se están a producir, contou Samaniego, quen confía en que a restauración será unha realidade.

O proxecto presentado divídese en dúas partes. Na primeira, acometerase a limpeza dos 9 metros de pintura, afectados por unha mancha homoxénea provocada polo paso do tempo e os fumes. Posteriormente, trataranse outras deficiencias detectadas, como fisuras ou perda de policromía. Na segunda parte do plan intervirán os arquitectos. Prevese o desecamento do muro sobre o que se asenta a obra para mitigar os efectos das sales e a a colocación dunha mampara de metacrilato para protexer a representación do mar pintada por Lugrís.