Con esta cesión, as instalacións da antiga Residencia de Oficiais de Batallóns, sen uso por parte da Armada desde hai algúns anos, serán utilizadas por parte da Universidade da Coruña para actividades docentes e administrativas da propia Universidade. Aínda que o prazo inicial de duración desta concesión é por un período de cinco anos, transcorridos os dous primeiros anos a Universidade da Coruña comprométese a iniciar as negociacións para adquirir definitivamente a propiedade no prezo que, nese momento, se tase polos servizos técnicos do Ministerio de Defensa. Durante a vixencia desta concesión, a Universidade da Coruña satisfará ao Ministerio de Defensa un canon anual pola utilización desta propiedade.

No acto de firma, celebrado no Arsenal Militar de Ferrol esta mañá, estiveron presentes xunto aos representantes do Ministerio de Defensa, o Excmo. Sr. Reitor Magnífico da Universidade da Coruña, Xullo Ernesto Abalde Alonso, e a Sra. Vicerreitora do Campus de Ferrol e Responsabilidade Social, Dª. Araceli Torres Miño.