Na Coruña e en Ribeira a especie máis vendida nestes primeiros dias de xuño, foi o lirio con máis de vinte tres mil quilos na cidade herculina (0,67 € de prezo máximo) e setenta e seis mil na ría de Arousa (2,57€). En Celeiro descargaronse 40.000 quilos de pescada (4,62€) e en Burela 32.000 quilos de xurelo (2,80€).

Nos tempos do imperio romano

A xarda era xa coñecida no tempo do Imperio romano. As súas vísceras usábanse para facer o garum, o seu prebe preferido. Peixe dos azuis, anda en bandadas, péscase á rede e á cacea ou corricán. Prepárase aberta no forno, en lombos mariñados, afumadas ou simplemente fritas, con patacas e ensalada.

Rincha, cabala, verdel son algúns dos seus nomes. Hoxe a xarda ten moitos partidarios e hai moitas modas de poñela; en guiso de patacas, limpa, cortada en filetes e fritida. As máis grandes van mellor no forno, sobre un leito de patacas e cebolas xa douradas, pementos e tomates cun pouco de limón, segundo Fausto Galdo no Abecedario das Mantenzas. Alvaro Cunqueiro engádelle máis nomes á xarda, indicando que tamén se lle chama, macareu, virote e torno. Afirma o escritor que a cabala do verán excita o apetito carnal, escasamente nos homes, pero en alto grao nas mulleres. Segundo Cunqueiro, “as algo tímidas e agarimosas galegas volvense ousadas, enternecen ao marido que sorrí, e pasa o que pasa”.