Os “Mundos etéricos” de Rosa Salanova amósanse neste mes de marzo na Casa da Cultura de Fene. O venres, 6 de marzo, inaugúrase na sala de exposicións temporais da Casa da Cultura a mostra “Mundos etéricos”, da pintora fenesa Rosa Salanova. No acto intervirán tamén as escritoras coruñesas Ana Julia Martínez Fariña e Rosi Sarmiento. Ao remate do mesmo haberá un pase de danza oriental con veos a cargo de Silvia Escudero, da Compañía “Shakti Danza”.

Di Rosa Salanova, que “Mundos etéricos" é unha exaltación do meu Ser, que desexa expresar a través da arte os mundos sutís que habitan outros planos dimensionais, e que tamén forman parte da vida e representan a parte máis elevada da existencia”. A exposición poderá visitarse do 5 ao 30 de marzo na Casa da Cultura.

Sobre a pintora fenesa.

Pintora fenesa, Rosa Salanova comeza a súa formación artística no ano 1989 da man do recoñecido pintor galego Ricardo Segura Torrella co que estudou durante varios anos debuxo, pintura, acuarela e técnicas mixtas. Tamén estudou gravado na Fundación CIEC (Betanzos) e no Museo de Belas Artes (A Coruña). Participou en numerosas exposicións, tanto individuais como colectivas. A súa obra, amais de en España, amósase en diversos países como Estados Unidos, Marrocos, Italia, Francia, Cuba (Museo Bacardi), Colombia (Museo del agua, Museo de Arte Contemporá- neo La Huila) ou Arxentina (Claudio León Sempere). Entre os premios e recoñecementos que ten acadado, salienta o primeiro premio de grabado no Certame Museo Claudio León Sempere, (Bos Aires, Arxentina).

(No centro da imaxe, Rosa Salanova, no cine Adriano de Barallobre en 2019 con outras pintoras amigas)