No encontro mantido cos presidentes dos comités, o rexedor nedense trasladoulles o seu respaldo pechado ás súas demandas de carga de traballo para os estaleiros da ría. É máis, durante o transcurso da reunión, Ignacio Cabezón comprometeuse a incluír unha proposta de adhesión ás súas reivindicacións na orde do día do pleno extraordinario que se celebra hoxe en Neda. Con toda seguridade haberá unanimidade dos grupos políticos ao redor destas demandas e avanzou que o acordo plenario se trasladará á Xunta de Galicia e ao Goberno de España.

Entre estas demandas do naval está dar cumprimento inmediato aos compromisos pendenes cos estaleiros, como a construción da sexta fragata ou buque similar para a Armada Española e a construción do Dique flotante, cuxa obra permitiría
unha ocupación practicamente inmediata para preto dun milleiro de traballadores durante uns dous anos.
Por último, o alcalde de Neda comprometeuse tamén a informar os veciños-as, institucións e asociacións da localidade do resultado da sesión plenaria na que se aprobará o respaldo ás reivindicacións dos traballadores.