María Fumaça chega de estrea total ó Auditorio Mar de Vigo, para presentar a súa nova viaxe, “Xiqui Xoque Fíu Fíu”, no que participan artistas como Uxía, o grupo de títeres Tanxarina, Carlos Blanco e un montón de grandes músicos, actores e actrices. Despois do enorme éxito que tivo na primeira entrega, María Fumaça chega con novas cancións, novo disco e nova viaxe, pero sempre traendo esa gran festa de participación colectiva que transmiten os máis de vinte artistas que chegan a xuntarse no escenario. É unha alegría que contaxia a todos os cativos que coñecen case todas as cancións e onde non faltarán todos os éxitos do primeiro disco. Nesta ocasión o seu prota, o maquinista Rui, guiará a locomotora por un fermosísimo musical que nos descubre valores como a solidariedade, a alegría, a comprensión e a normalización funcional. María Fumaça ten a virtude de transmitir uns valores didácticos que os cativos reciben envoltos nun ambiente de festa contínua. ¿Queres viaxar á estación da alegría e ó país da festa multicor? Pois sube no tren de María Fumaça e déixate guiar polo noso mellor maquinista!