ACTUALIDADE
-
Novas
Novas sobre programas, emisoras,... Todo o mais actual e de interese nesta sección.
-
Radio á carta
Escoita online os podcasts dos teus programas favoritos de Radiofusion.
Praza Alcalde Ramón Souto s/n, 15500 Fene (A Coruña) Galicia - Tfno. 981 492 773 - noticias@radiofusion.eu
Facebook
Twitter
Entre hoxe e mañá está previsto que remate a instalación dos novos armarios destinados á compactación dos fondos do arquivo municipal de Fene. Os traballos desenvolvéronse en dúas fases, sendo a última posible grazas a unha subvención de trinta mil euros que concedeu a Dirección Xeral de Patrimonio Cultural ao Concello.
Ademais de financiar a segunda fase de compactación de documentos no arquivo municipal, a axuda da Xunta de Galicia permitirá poñer en marcha o proceso de dixitalización do fondo histórico de Fene. Segundo explicou a Radiofusión a arquiveira municipal, Mar Fontela, “será un proceso longo, seguramente de anos, pero vai permitir achegar aos veciños e veciñas documentos moi valiosos”.
A día de hoxe xa están mercados os equipos que se empregarán na dixitalización dos documentos: un escáner A3 e unha máquina multifunción. Ademais, segundo Mar Fontela, o traballo xa está planificado. “Comezarase polos libros de actas dos Plenos, dende o ano 1900, e logo pasarase aos documentos do século XIX e aos que estean en peor estado”.
No tocante á compactación do arquivo, a responsable do departamento explicou que xa están practicamente instalados os novos armarios no baixo anexo á Casa do Concello. Cando remate o proceso, asegurou Mar Fontela, “haberá espazo suficiente para arquivar novos documentos durante os vindeiros sete ou oito anos”.