“No Barco de Valdeorras tíranse cada ano miles de toneladas de residuos e o que fixemos foi buscarlles un uso”, explicou o director do Instituto de Cerámica de Galicia, Francisco Guitián. O centro universitario realizou este proxecto en colaboración cunha cunha empresa de Valdeorras e un instituto de investigación de Ucranía, grazas ao cal dispuxeron de tecnoloxía industrial soviética para a obtención das fibras.

O Instituto de Cerámica de Galicia (ICG) naceu en 1990 e está integrado por unha vintena de profesionais, entre eles físicos, químicos, enxeñeiros e técnicos. Trátase dun centro mixto, que pertence tanto a empresas como á Universidade. Nos seus inicios dedicábase principalmente ao estudo da cerámica, pero na actualidade ese labor só ocupa un 20% do traballo, investindo a meirande parte do tempo na investigación de todo tipo de materiais industriais. Nos seus anos de vida, o Instituto deu lugar á creación de tres empresas que xa se lanzaron ao mercado: Neoker, a única produtora mundial de whiskers de alumina; Keramat, a única compañía estatal fabricante de biocerámicas; e a última, Mifibra, dedicada a creación de fibras minerais a partir dos residuos de lousa.