A representante das Irmás Oblatas Rosario Etcheverría, agradeceu o apoio do Concello de Ferrol posto que lles permitirá “actualizar a formación e seguir axudando ás mulleres con menos posibilidades económicas, sociais e culturais na súa plena integración”. Etcheverría puntualizou ademais que esta subida permitirá ao centro pór en marcha un curso específico sobre atención sociosanitaria a persoas dependentes en institucións sociais. Esta actuación estaría dirixida a mulleres que exercen a prostitución ou se atopan en risco de exclusión social. O centro das Oblatas atendeu durante 2011 en Ferrol a case medio milleiro de mulleres na súa maioría vinculadas a situacións de trata de brancas con fins de explotación sexual e prostitución. Deste grupo, case o 90% foron inmigrantes, destacando por número o colectivo procedente de Brasil. O Centro funciona na Rúa Espartero, 51 de Ferrol.