O reitor da Universidade da Coruña, Julio Abalde, asina hoxe ás 13:00 horas na Sala de Xuntas da Reitoría, un novo acordo de colaboración para consolidar a Unidade Mixta de Investigación UDC-Navantia “O estaleiro do futuro”. Na firma estará, por parte do estaleiro, o director de Tecnoloxías Dixitais de Navantia, Carlos Merino, que codirixe a UMI UDC-Navantia xunto co profesor da Escola Politécnica Superior, Pablo Fariñas. A consolidación da UMI UDC-Navantia vén de ser aprobada pola Axencia Galega de Innovación, GAIN, cunha axuda total de 2,59 millóns de euros, cunha duración de tres anos ata 2021.

Co acordo que se asina hoxe, a Universidade e a empresa concretan as relacións entre ambas as dúas partes dos próximos tres anos. Nos vindeiros tres anos, a UMI traballará nas liñas principais de investigación abertas en 2015, entre as que destacan os proxectos de Modelado e Simulación de procesos, Trazabilidade de elementos intelixentes e Sistemas de Servizos Integrados (tamén coñecido como buque sen cables e no que colabora tamén a Universidade de Vigo); e engadirá dous novos proxectos, un sobre Xemelgo Dixital e outro sobre “operador asistido” que contará coa axuda de CTAG. (Na imaxe, o Comité de dirección da UMI).