O lado máis humano da crise

O lado máis humano da crise
19 de Maio, 2020 - 12:59 h. | Publicada por Radio Fene

O Servizo de axuda no fogar aumentou no concello de Fene un 53%. De 122 persoas usuarias antes da crise sanitaria, pasouse de golpe a atender a 65 persoas novas.

ESCOITA O PODCAST:

O Servizo de Axuda no Fogar revelouse como un dos grandes paliativos da crise sanitaria do coronavirus. O confinamento da poboación deixou sen protección a moitas persoas maiores que viven soas ou dependían en parte dos seus familiares. A crise sanitaria destapou a importancia deste servizo como apagalumes, pero tamén como alternativa de vida. O concello de Fene tiña o ano pasado 122 persoas usuarias do servizo de axuda no fogar. A crise sanitaria fixo que esta cifra aumentase de golpe en 65 persoas máis, o que supón un 53% de medre e continúan dándose altas. Desas 65 novas altas, 20 son definitivas a través da Lei de Dependencia da Xunta de Galicia, e 45 son altas de emerxencia, concedidas temporalmente mentres dure a alarma sanitaria.

Hai que distinguir, en palabras da funcionaria responsable deste servizo, nos SS SS de Fene, Manuela Real Rego, o sistema de dependencia que provén da Xunta de Galicia e o sistema básico. Polo primeiro, Fene ten concedidas 4.981 horas por mes, que agora aumentaron a 8.207 (3.226 horas máis, o que supón un 65%  máis). Este aumento é provisional debido á situación extraordinaria que vivimos, contando desde mediados de marzo ata que remate a alarma sanitaria. Estas persoas ríxense pola Lei de Dependencia de 2008 que require o recoñecemento dun determinado grao de dependencia. O Servizo básico é o de sempre, afirma Manuela Real, no que se inclúe a persoas que aínda non teñen recoñecido o grao de dependencia pero que precisan igualmente axuda. Este se tramita a través do concello e a valoración fanna as traballadoras sociais municipais.

O traballo que afronta o persoal do servizo de axuda no fogar inclúe tarefas de todo tipo, relacionadas co aseo persoal, apoio á movilidade, comida, limpeza do fogar, etc… dependiendo das necesidades individuais de cada usuario ou usuaria. Se algo aprendemos desta crise do Covid19 é que este servizo é máis importante do que podería parecer porque abranque as necesidades de moita poboación. “A crise destapou as necesidades reais que temos” afirma Manuela Real, quen desexaría unha maior dotación para melloralo xa que as persoas cun grao 3 de dependencia estaban atendidas, pero había unha longa lista de agarda das persoas con graos 1 e 2. Real conclúe que son necesarias máis horas porque estas están esgotadas. Deron 20 altas novas, de copago, e 45 altas de emerxencia gratuitas neste período extraordinario. Fene tiña unha lista de agarda a 80 persoas.

Institucional

Publica o teu comentario agora