Cando a fotógrafa portuguesa Isabel Valentim Leal preparou a exposición Corazóns casuais varios amigos galegos ofrecéronse a compoñerlle banda sonora. Nacía así o proxecto CoraSons, que ademais de mesturar imaxe e música tende pontes entre países e culturas. Segundo explicou Uxía nos micrófonos de Radiofusión, o obxectivo é que a iniciativa, despois de facer parada na Illa de Arousa, viaxe por outros puntos do universo lusófono. “Boa falla fai nos tempos que vivimos que as cousas se fagan de forma autoxestionada, co corazón na man e pouco máis”, asegura a cantante, quen defende que “é un bo momento para a unión” entre os artistas.