Este envío foi acompañado dun escrito dirixido á propia responsable comunitaria onde se lle informaba da delicada situación que están a sufrir miles de explotacións de leite en Galicia, o que incide tamén na degradación da propia economía e do medio rural galego. No mesmo texto ínstase a Fischer Boel a poñer en marcha as medidas precisas para mudar a situación mediante a redución da produción, eliminando o aumento do 1% da cota prevista para este ano; o establecemento dun debate sobre as modalidades desta redución; o mantemento dun control público da produción; a garantía dunha renda suficiente a todos os produtores de leite; a supresión das restitucións á exportación, que é a forma mais visible de dumping cara terceiros países; favorecer a produción leiteira a base de forraxes locais e pastos permanentes; e desenvolver unha nova política leiteira nunha PAC onde o marco da OMC se substitúa polo da soberanía alimentaria.