ACTUALIDADE
-
Novas
Novas sobre programas, emisoras,... Todo o mais actual e de interese nesta sección.
-
Radio á carta
Escoita online os podcasts dos teus programas favoritos de Radiofusion.
Praza Alcalde Ramón Souto s/n, 15500 Fene (A Coruña) Galicia - Tfno. 981 492 773 - noticias@radiofusion.eu
Facebook
Twitter
A comezos do mes de abril chegará ás librarías o cómic de Manel Cráneo “Os lobos de Moeche”, publicado pola editorial Demo en colaboración coa Asociación Euroeume. O álbum, ambientado no último tercio do século XV, conta a historia dun labrego -Martín de Ferreira- que se ve envolto nas Revoltas Irmandiñas.
“Os lobos de Moeche” é a primeira aventura gráfica en solitario do debuxante Manel Cráneo. Trátase dunha historia de aventuras na que se mesturan personaxes históricos con outros de ficción, coma o protagonista, Martín de Ferreira, un labrego que vive no entorno do Castelo de Moeche e que, logo de participar nas Revoltas Irmandiñas, acaba converténdose “nunha especie de persoaxe do Renacemento”. De feito, conta as súas memorias dende a cidade italiana de Bolonia.
Segundo Manel Cráneo, resulta moi interesante comprobar no álbum cómo eran as relacións dos personaxes históricos que aparecen reflectidos e cómo era a rede de conspiracións que existía entre os nobres para controlar o poder e a sociedade da época.
“Os lobos de Moeche” supón a presentación da editorial Demo, unha empresa de nova creación que aposta polo cómic en galego e pola recuperación do patrimonio histórico de Galicia. Para levar a adiante o proxecto foi precisa ademais a colaboración da asociación Euroeume que, unha vez publicado, empregará este cómic como material promocional para o Museo do Castelo de Moeche.
Segundo adiantou a Radiofusión Manel Cráneo, o cómic estará nas librarías galegas na primeira semana de abril. Ademais comercializarase a traves do clube de lectores Biblos.