Por segundo ano consecutivo a galería Campo das Redes en colaboración coa Asociación de Furancheiros de Redondela e a Concellería de Cultura pon en marcha este curioso proxecto que converterá adegas, galpóns e garaxes en “enxebres museos”.Na iniciativa participan máis de trinta establecementos diseminados polas distintas parroquias do municipio que serán os encargados de acoller as obras de artistas plásticos, fotógrafos e escultores entre os que atopamos nomes como Concepción Rivera, Felix Cal e Marcos Escudero. Obras que van dende as máis económicas que poden custar 50 euros ata as de maior prezo que roldan os 6.500 euros.

Entre os traballos que máis están chamando a atención, a responsable da galería Campo das redes, Ana Carbajal destacaba as esculturas de gran formato elaboradas en madeira, pedra e ferro obra do artista Angel Manuel Rodríguez “Piquico” onde atopamos un voitre de 120 centímetros ou un avestruzo que supera os dous metros. Como novidade este ano sortearase entre a clientela dos furanchos un cadro de Xavier Lemos valorado en 1600 euros.