O escultor veciño de Barallobre Xoán Ramón Pena Soto participa na Bienal Internacional de Arte do Morrazo que pode visitarse na sala de exposicións do auditorio de Cangas ata o dezasete de xullo. Todo o mundo o coñece como Che, polas súas orixes arxentinas. Naceu en Buenos Aires pero se sinte moi galego, o seu pai era de Franza e a nai de Barallobre. Foi delineante en Navantia, na actualidade pensionado, desde finais da década dos noventa fai escultura. Utiliza material de desguace e residuos industriais.  A súa obra inclúese no apartado de escultura-instalación. Para esta exposición do Morrazo presenta unha escultura realizada con materiais industriais e composta por elementos circulares, aros e cilindros que representan un concepto abstracto titulado “O infinito máis cerca”.