Así se puxo de manifesto na Comisión celebrada en Santiago no día de hoxe onde se fixo constar que o proxecto de recuperación da carballeira de Arzúa responde a un programa deseñado por unha empresa especializada no que se plasma unha ambiciosa actuación destinada non só a evitar que morran máis carballos senón a facilitar que os que aínda se poidan salvar do seu estado de deterioro e asfixia poidan sobrevivir nunhas condicións que lles permita recuperar o esplendor perdido.

A autorización de Patrimonio, ademais de permitir continuar coas obras, paralizadas trala denuncia do Partido Popular, tamén serve para desmentir e deixar en evidencia unha vez máis a mala fé coa que actuaron os grupos políticos do Partido Popular e Partido Socialista, xunto coas súas Plataformas anexas.

Que Patrimonio declare legais e autorice as obras que se estaban executando na Carballeira de Arzúa permite sacar moitas conclusións:

• Que o Goberno Municipal de Arzúa fixo un traballo exemplar cuxa única finalidade era a da conservación dun patrimonio natural e histórico único en Arzúa. Que o Goberno Nacionalista fixo ese traballo con todas as garantías e asegurándose de que nada do que se proxectou era ilegal, o proxecto está avalado por unha empresa de gran prestixio neste tipo de traballos e pola rigorosidade e a profesionalidade dos técnicos municipais.

• A autorización de Patrimonio tamén revela que todas as críticas pronunciadas polos voceiros do Partido Socialista e do Partido Popular se volven contra eles e os deixan en evidencia. Ponse así de manifesto as mentiras, inxurias e calumnias pronunciadas dende o seo destes dous partidos en conivencia coas súas plataformas.

• Queda así demostrado que non se cortaron carballos centenarios como presumía Xavier Pintor nin se levou a cabo un proxecto devastador como pretendía Leyre Aldasoro.

O Alcalde de Arzúa, Xaquín García, que asistiu esta mañá a reunión da Comisión de Patrimonio fixo pública a súa satisfacción porque “agora poderemos continuar uns traballos que tivemos que paralizar por culpa da oposición e que agora se demostra que eran non só legais senón moi necesarias para a conservación da carballeira”. Xaquín García quixo agradecer aos veciños o seu saber estar por non ter entrado na demagoxia practicada pola oposición con este tema xa que o único que conseguiu o PP e o PSOE coa súa denuncia “foi atrasar as obras e entorpecer o normal transcorrer das feiras que se celebran no recinto os días 8 e 22 de cada mes”.

Tamén insistiu o Alcalde en que as obras se reanundarán á maior brevidade agora que quedou demostrada non só a súa legalidade senón a súa necesidade e aclarou ademais que “lamentamos o tempo perdido porque o traballo do noso goberno sempre está avalado por criterios técnicos e profesionais”.