Os socialistas abstivéronse neste punto, expoñendo as súas dúbidas acerca da idoneidade da ubicación do ximnasio na primeira planta da piscina, ao concentrarse nesa localización o ar quente. O BNG indicou que Oleiros ven de lograr unha axuda de cincocentos mil euros para renovación e ampliación dunha piscina construida co mesmo proxecto e nas mesmas datas que en Fene.

O pleno non respaldou a proposta do Partido Popular para ceder á Mancomunidade a xestión do punto limpo de Vilar do Colo. Os socialistas reclamaron datos sobre os custes económicos do servizo e maior claridade sobre a fiscalización da empresa que xestione a instalación. O Bloque tamén se opuxo indicando que os informes técnicos son desfavorabeis. O alcalde Gumersindo Galego apuntou como posible solución a xestión conxunta do punto limpo entre Cabanas e Fene, asinando despois un convenio con Ares e Mugardos para acoller aos seus residuos. Os concelleiros aprobaron por unanimidade unha declaración contra a violéncia machista.

O voceiro socialista Antón Noceda reclamou a convocatoria dun Pleno extraordinario para debater unicamente a regularización do Catastro e as protestas orixinadas en Fene por esa medida. A concelleira de Esquerda Unida Mari Carmen Martinez reclamou actuacións máis decididas contra a proliferación de ratas nas zonas próximas á Praza Verde de Perlío.