A marcha partiu da praza da Palloza e terminou diante do edificio da Deputación. Alí concentráronse máis de 500 bombeiros de toda Galicia que reclamaban que os recibise o presidente da Deputación. Os manifestantes tiraron durante a manifestación petardos e bengalas e nun momento dado os antidisturbios iniciaron unha carga que alcanzou a varios xornalistas que cubrían a protesta. Tras esta carga, os manifestantes responderon tirando varios sinais de tráfico e lastros e de novo houbo outra carga policial.

Ao final os representantes dos tres sindicatos, UXT, CC.OO. e CIG entraron coa intención de reunirse co presidente, Salvador Fernández Moreda, pero finalmente segundo eles non os recibiu. Moreda, pola súa banda dixo que tal reunión non estaba prevista e que se dirixían ao rexistro. O tráfico do centro da Coruña colapsouse por esta protesta. Os manifestantes protestan contra o que eles consideran a privatización dos servizos de urxencias e solicitan a cración «dun servizo público galego de prevención, extinción de incendio e salvamento». O presidente da Deputación afirmou que desde a súa chegada ao ente provincial creáronse sete parques de bombeiros e que herdou un modelo que se instaurou antes da súa chegada.