“Convidamos cordialmente, amorosamente, a todas aquelas persoas que lle queiran ao galego e o sintan como propio, indepententemente da súa ideoloxía, a que realicen con nós este exercicio de lexítimo orgullo e dignidade, así como a reclamar na manifestación deste domingo en Santiago os dereitos que nos asisten a poder usar o galego en todas as circunstancias da nosa vida diaria”, dixo a escritora de O Incio.
Para facilitar o transporte aos que desexen acudir á cita do domingo co idioma, “Queremos Galego” informou de que haberá autobuses gratuítos desde distintas vilas e localidades da provincia. Así, sairán vehículos desde Vilalba (ás 9:30 horas diante da Casa da Cultura), Sarria (9:15 horas dende o cruce da Cigüeñeira), Poboa de San Xiao (9:30 horas no cruce da Estación), Riotorto (9:00 horas na praza do Concello), Meira (9:30 horas na praza Maior), Guiritiz (10:30 horas na área de servizo da Autovía) e Lugo (10:00 horas diante do Edificio sindical ubicado na Ronda da Muralla). O teléfono para reservar praza é o 982 22 58 12.
Ao acto de hoxe ao pé da Muralla asistiron persoas do mundo da cultura, como o escritor Paco Martín ou a escultora Mónica Alonso; do mundo do deporte, como representantes do Azkar de fútbol sala; así como membros das distintas asociacións e colectivos que integran a plataforma neste momento, desde asociacións veciñais como a da Milagrosa ou a Federación de Asociacións de Veciños de Lugo, ata as principais asociacións culturais da comarca como os casos de Instituto de Estudos Chairegos, LugoPatrimonio, o Clube Cultural Valle Inclán, María Castaña, Xermolos de Guiritiriz, Arumes do Corgo ou Ergueitos de Sarria. Tamén apoiaron o acto sindicatos como STEG, CIG ou CCOO; grupos de teatro como Achádego; de música como Fuxan os Ventos ou Quempallou; representantes de colexios profesionais, como o de Enfermería ou o de Arquitectura; deportistas como o dianteiro do CD Lugo, Sergio, ou os irmáns Vallejo; e escritores como Xosé Miranda ou Isidro Novo.
Críticas ás medidas “regresivas” postas en marcha polo Goberno de Alberto Núñez Feijóo
Esta plataforma de defensa do galego comeza a súa andaina sobre dúas propostas de traballo concretas: o impulso e desenvolvemento nos vindeiros meses dunha Iniciativa lexislativa popular (ILP) para garantir os dereitos lingüísticos das galegas e galegos e a convocatoria dunha gran mobilización nacional en Santiago de Compostela para o vindeiro domingo día 18 de outubro.
Marica Campo explicou que “por primeira vez en toda a historia da autonomía, o Goberno galego non só non está a defender a nosa lingua propia, senón que encabeza o ataque contra o seu uso nos diferentes ámbitos”. Para a responsable desta plataforma cidadá, o Goberno presidido por Alberto Núñez Feijóo “é o primeiro destes 30 anos de democracia que non respecta a obriga fixada no Estatuto de Autonomía de promover e potenciar o uso da lingua galega e garantir os seus usos oficiais”. Segundo Campo, “todas e cada unha das medidas gobernamentais executadas ou anunciadas nestes meses no ámbito da Xunta teñen ido dirixidas a anular medidas positivas para o noso idioma”. A escritora definiu como exemplos desta política autonómica “o anuncio de derogación do 50% do ensino en galego, a supresión das axudas á tradución de libros ao galego, ou a contrarreforma da Lei da Función Pública que fai que non sexa necesario coñecer o galego para acceder a un posto de traballo na Administración galega”.
Marica Campo tachou de “falsa” a teoría da imposición que se está a lanzar desde sectores da do Goberno na Xunta e afirmou que “se o conxunto dos poderes públicos operantes na Galicia tivesen aplicado as leis e as normas que protexen o galego non estariamos a reclamar dereitos igualmente mínimos e básicos”.
