O Sindicato Labrego Galego valorou o feito de que se recupere a unidade das organizacións agrarias para defender que é preciso respectar o prezo do leite. Carme Freire salientou que se mantiveron reunións a nivel estatal para que a mobilización dos produtores sexa unitaria tamén noutras comunidades. A voceira do SLG pediulle á ministra Espinosa que defenda os dereitos dos gandeiros ante a Unión Europea.

Quen pintou o panorama máis escuro foi Roberto García, de Unións Agrarias. Na súa opinión, a actual crise pode levar por diante o sector industrial español e no caso do sector agrogandeiro derivar no “crack” de moitas empresas cuxa viabilidade xa está baixo mínimos. Segundo García, se non se adoptan solucións inmediatas, as distribuidoras terán que asumir unha reconversión e os produtores deberán buscar fondos de garantía para poder cobrar.

A concentración en defensa do sector lácteo galego será o vindeiro luns no centro de A Coruña.