Profesoras e alumnos do IES de Fene acudiron esta mañán á casa do concello cargados con caixas cheas de bonecos. Non son bonecos calquera senón “quitapenas” bonecos artesáns feitos con la e trapos polo alumnado do instituto e que agora  enviarán aos nenos e nenas palestinos como un xesto de solidaridade e de desexos de paz.

A xefa de estudos do centro fenés, Loli Lago, explicou que a iniciativa xurdíu no instituto de Cangas e a través das bibliotecas escolares se extendeu a outros centros galegos. Puxeron en  marcha un obradoiro para aprender a facer os bonecos “quitapenas” que teñen ese nome porque, segundo unha tradición guatemalteca os nenos deben poñelos baixo as almofadas e así se lle van as penas que poidan ter.

Mais de 100 bonecos sairán do IES Fene esta semana en dirección a Gaza, a través da Fundación Araguanei , acompañados dunha carta que traduciron ao árabe para que a reciban os rapaces palestinos. O alcalde de Fene acompañounos na presentación da campaña, felicitándoos pola iniciativa que axuda a que a comunidade internacional non se esqueza do conflicto que vive esa zona.