A novidade desta edición do salón é a participación de Cuba como país convidado que estará presente en todas as accións previstas en Xantar, promovendo a súa gastronomía, turismo e artesanía. Contará cun restaurante liderado pola Sociedade Cultural Rosalía de Castro, que é un dos Centros Galegos da Habana. O menú que presenta a illa recolle algúns dos seus pratos máis emblemáticos como o ajiaco crioulo ou o arroz con feixóns negros que serán maridados con viños da D.O. Ribeiro.

A promoción da calidade da gastronomía ibérica a través de elaborados menús será outro dos obxectivos principais desta edición. Dos 18 restaurantes presentes, 12 pertencen á nosa comunidade e entre todos eles potenciarán a Dieta Atlántica, con espazo para promover tamén as festas gastronómicas como é o caso do "Galo deCurral" de Vila de Cruces que participa por primeira vez no salón cun restaurante.

O programa de actividades de Xantar 2014 incluirá tanto conferencias de expertos coma exhibicións de cociña en directo, ademais de catas comentadas e degustacións incluídas no chamado "Encontro Ibérico sobre Dieta e Saúde" que afronta xa a súa 9ª edición. En total, máis de 120 actividades orientadas a profesionais e tamén afeccionados e que por primeira vez serán de carácter gratuíto (con acceso mediante a entrada de feira).

Xantar 2014 puxo en marcha diversos modelos para aos visitantes procedentes da Coruña, Santiago de Compostela e Vigo que poden achegarse a Ourense na liña de Alta Velocidade, AVANT, e nun mesmo paquete ter entrada ao salón e visita turística. Convén recordar ademais que todos os visitantes que acudan ao salón en tren dende calquera parte de España obterán un 30% de desconto que pode obterse en www.xantar.org.

Co obxectivo de estimular a participación de parellas, e dada a proximidade do Día de San Valentín, a organización de Xantar puxo en marcha un sorteo especial dunha viaxe de 6 días / 5 noites a Madeira para dúas persoas con voos e estanza en hotel de 4 * en réxime de aloxamento e almorzo.