Remataráse coa parte aínda máis festeira da noite, que será o concerto de Os Tres Trebóns, treboada bravú que axudará a queimar as brochetas galegas a base de zorza, raxo e chourizos que poderás desfrutar durante a festa. A entrada é de balde, tanto ao contacontos, que se celebra no interior da Casa da Cultura, como á festa do exterior.

O colectivo Terra de Pontedeume traballa arredor de boas causas, causas ecolóxicas, culturais, feministas, de memoria histórica, como a homenaxe que fixeron hai uns meses ao guerrilleiro Pancho. O colectivo Terra ten unha sede social na urbanización Boavista de Pontedeume e uns 50 socios aproximadamente. Unha vez pasen as Peras e Breamo, é dicir, despois do verán, retomarán o Festival Treme a Terra que leva uns anos sen celebrarse. E vanno facer pensando na violencia de xénero e en xeral nas mulleres, segundo declarou a Radio Fene, Carlos Mosqueira.

“Os temporais renden as súas colleitas na costa do país. Desta volta a creba foi unha estrela vermella”. A estrela de mar do cartaz deseñado polo fotógrafo, José Cabalar.  “Saúde e Océano”. É a frase que acompaña a Festa da Patria, este sabado en Pontedeume.