A Festa do Esquecemento ten a súa orixe histórica na chegada ata a marxe esquerda do río Limia das lexións romanas comandadas por Décimo Xuño Bruto no ano 135 aC. A beleza do lugar fíxolles xulgar que se atopaban diante do lendario río Lethes, o río do Esquecemento, que apagaba todos os recordos da memoria de quen o atravesase. Entón, empuñando o estandarte das aguias de Roma o comandante chamou desde a outra marxe a cada soldado polo seu nome. Así demostroulles que ese non era o río do esquecemento.

As celebracións comezarán o venres coa concentración dos grupos no campamento. A continuación, terá lugar o desfile que levará aos participantes ata a praza Maior, onde se acenderá o lume sacro e procederase, na medianoite, á lectura do pregón inaugural, que este ano correrá a cargo de Tamara Canosa, actriz protagonista de Pradolongo. O grupo de folk tradicional Treixadura encargarase de pór a nosta musical.

Xa o sábado pola mañá abrirase o mercado de artesanía e poranse en marcha diversas iniciativas como unha exposición didáctica sobre Roma, un taller de arqueoloxía e equitación para os nenos. Pola tarde, os xogos celtas e romanos serán os protagonistas, xunto ás vodas e nasciturus. Igualmente, homenaxearase aos que fixeron posible a festa ao longo destes dez anos e celebrarse unha cea-espectáculo e unha festa galaico-romana, que finalizará cunha gran queimada.

Finalmente, o domingo será cando as tropas romanas, comandadas por Décimo Xuño Bruto, fagan a súa aparición no río Lethes (río Limia) e producirase o tradicional cruzamento da canle e a gran batalla entre castrexos e romanos. Tamén haberá desfile, circo romano e a Festa do Esquecemento rematará cunha cea no campamento e co apagado do lume sagrado.