O evento localizarase entre as avenidas Naturais de Fene e do Concello e a avenida Marqués de Figueroa, os tres eixos nos que están instalados os 20 negocios que participan nesta edición. Comprar na localidade e descubrir a calidade e profesionalidade que ten o comercio de Fene son os motivos principais do outlet, en palabras do presidente da asociación de comercio de Fene “O Cruceiro”, Juan Ramos. O escenario serán as haimas diante de cada establecemento. Os comerciantes porán alí as súas mellores ofertas. Agás algúns que se instalarán nas carpas habilitadas polo Concello para a ocasión, cada un defenderá a súa oferta e amosará xa algúns produtoS da nova tempada de outono.

Organiza esta actividade o Concello de Fene xunto coa Asociación de Comercio, Hostalería e Servizos de Fene. Juan Ramos adiantounos que xa están organizando o concurso de tapas que quedou frustrado no pasado mes de maio pola proximidade das eleccións. Segundo acordaron hostaleiros e concello, o concurso de tapas fixarase entre o final de novembro e primeira semana de decembro. Buscan dar un salto cualitativo desta vez, procurando que as tapas sexan de moita calidade.